Fréttir vikunnar: Fjölmenn Bieber-ganga og aldraður ökuþór

Vikan hófst með fréttum af ökumanni sem velti bifreið sinni á Hafnarfjarðarvegi. Í ljós kom að ökumenn höfðu att kappi á götum úti með fyrrgreindum afleiðingum. Daginn eftir kom svo í ljós að ökumaðurinn sem velti bílnum hafði verið 67 ára gamall. Ökuþórinn var meðal annars með göngugrind í bílnum. Málið var hið sorglegasta, ekki síst vegna þess að hundur sem var farþegi í bílnum drapst þegar bíllinn valt.

Þá greindi Vísir frá mikilli skjálftavirkni við Goðabungu í Mýrdalsjökli.

Samkvæmt upplýsingum frá Veðurstofu Íslands þá hafa yfir 800 skjálftar mælst á svæðinu en til samanburðar mældust um 300 skjálftar á sama svæði fyrir ári síðan.

Svo virðist sem skjálftavirkni hafi stóraukist eftir hlaupið í Múlakvísl en þrjú hundruð skjálftar mældust aðeins í síðustu viku.

Að sögn sérfræðinga hjá Veðurstofu Íslands er ekki meiri hætta á eldgosi í Kötlu, frekar en áður

Magnús Tumi Guðmundsson, jarðeðlisfræðingur við Jarðvísindastofnun Háskólans, flaug svo yfir Kötlu ásamt sérfræðingum frá Veðurstofu Íslands og fulltrúa frá Almannavörnum. Hann sagði að greinileg aukning væri í jarðhita undir jöklinum og að Katla sýndi ýmis merki sem túlka megi sem langtíma undanfara eldgoss.

Það var svo mikið fjör í miðbænum í gær. Fimm til sexhundruð aðdáendur poppstjörnunnar Justin Bieber, gengu fylktu liði frá Hlemmi niður á Lækjartorg.

Forsvarsmenn göngunnar voru unglingsstúlkur á aldrinum 13 til 15 ára. Meðal þeirra er Þóra Silja Hallsdóttir.

Vísir tók viðtal við hana í miðri göngunni og átti fréttamaður í stökustu vandræðum með að heyra í henni fyrir fagnaðarlátum allt í kring.

„Þetta er alveg geðveikt!" hrópaði Þóra sem ásamt Lovísu Þóru, Guðrúnu Brynju, Anítu Rós Þorsteinsdóttur og Auði Ívarsdóttur, stóðu að Justin Bieber skrúðgöngunni.

Tilgangurinn er að biðla til goðsins um að koma til Íslands og syngja fyrir íslenska aðdáendur, sem engin vöntun er á miðað við mætingu.

Þóra sagði að myndir og myndbönd af göngunni yrðu send á Twitter og Facebook-síðu kappans í von um að hann bregðist við ákalli ungmennanna. Þá er bara að vona það besta.