Umfjöllun: Blikar björguðu sér frá falli

Blikar eru búnir að bjarga sér frá falli úr Pepsi-deildinni eftir góðan sigur á Þór á Akureyri í dag. Blikar unnu leikinn 2-1.

Fyrri hálfleikur var mjög fjörugur. Þórsarar byruðu betur og þeir skoruðu með fyrsta skoti leiksins.

Eftir frábært spil Gunnars Más, Inga Freys og Jóhanns Helga tóku Ingi og Jóhann þríhyrning sem sendi Inga innfyrir, hann var einn gegn Ingvari í markinu og skoraði með fínu skoti á nærstöng.

Þórsarar voru betri og Clark Keltie átti skot rétt yfir úr aukaspyrnu. Skömmu áður lenti Kára Ársælssyni og Inga Frey saman og vildu einhverjir meina að Kári hefði rekið olnbogann í Inga. Ekkert var dæmt og Ingi kvartaði ekki.

Blikar sóttu í sig veðrið um miðbik hálfleiksins. Þeir sóttu stíft og uppskáru jöfnunarmark sem var glæsilegt. Guðmundur Kristjánsson tók boltann þá á kassann og þrumaði honum í hornið. Vel gert hjá Guðmundi.

Srjdan Rajkovic varði svo stórglæsilega frá Kristni Steindórssyni, skot sem var á leið í samskeytin, og Kristinn átti svo hörkuskot í stöngina. Blikar voru betri út hálfleikinn en staðan 1-1 þegar flautað var til hálfleiks.

Seinni hálfleikur var einkar rólegur fyrsta korterið.

Þá tók Kristinn til sinna ráða og skoraði gott mark. Hann fékk stungusendingu innfyrir og kláraði færið sitt mjög vel. Staðan 1-2.

Seinni hálfleikur var frekar leiðinlegur, mikið um baráttu en lítið um færi. Þórsarar gerðu hvað þeir gátu en komust lítið áfram. Blikar virtust sáttir með sitt.

Þórsarar börðust einfaldlega ekki nógu mikið, eitt helsta einkenni þeirra var ekki til staðar. Blikar voru betri en áttu reyndar engan stjörnuleik.

Rajkovic bjargaði Þórsurum tvisvar stórkostlega og var hann besti maður Þórs. Kristinn fær nafnbótina maður leiksins fyrir markið sitt en annars voru fáir sem sköruðu fram úr í leiknum.

Sanngjarn sigur Blika niðurstaðan.

Þór 1-2 Breiðablik

1-0 Ingi Freyr Hilmarsson (3.)

1-1 Guðmundur Kristjánsson (29.)

1-2 Kristinn Steindórsson (64.)

Skot (á mark): 9-11 (3-4)

Varin skot: Srjdan 2 – 2 Ingvar

Horn: 6-7

Aukaspyrnur fengnar: 12-6

Rangstöður: 2-1

Áhorfendur: 1137

Dómari: Þorvaldur Árnason (5)



Hér fyrir neðan birtust sjálfkrafa allar helstu upplýsingar um framvindu leiksins, leikmannahópa liðanna auk textalýsingar frá blaðamanni Vísis á vellinum.