Sigurjón leiddur fyrir dómara - verjandi furðar sig á gæsluvarðhaldi

Sigurjón Þ. Árnason var leiddur fyrir dómara laust fyrir klukkan tvö í dag og úrskurðaður í ellefu daga gæsluvarðhald. Ívar Guðjónsson, forstöðumaður eigin fjárfestinga bankans, var úrskurðaður í vikulangt gæsluvarðhald.

Sigurður G. Guðjónsson, er verjandi Sigurjóns. Hann furðar sig á gæsluvarðhaldi yfir honum í ljósi þess hversu langt er liðið frá meintum brotum og hruni bankans. Sjá má viðtal við Sigurð í myndskeiði með fréttinni.

Stór liður í rannsókn sérstaks saksóknara vegna meintrar markaðsmisnotkunar bankans snýst um kaup á hlutabréfum í bankanum af hálfu félaga sem héldu utan um kauprétti starfsmanna Landsbankans og lánveitingar til þessara félaga. Átta aflandsfélög í eigu Landsbankans sem stofnuð voru utan um kauprétti starfsmanna voru látin kaupa 13,2 prósenta hlut sem gerði þau samanlagt að næststærsta eiganda bankans. Öll félögin lutu stjórn æðstu stjórnenda Landsbankans, þ.e Sigurjóns og Halldórs J. Kristjánssonar, án þess að smærri hluthafar og eftirlitsaðilar hefðu hugmynd um það. Samkvæmt upplýsingum fréttastofu eru grunsemdir um að þetta hafi falið í sér brot á lögum um fjármálafyrirtæki þar sem bankinn hafi í raun haft bein yfirráð yfir hærri hlut en lög heimiluðu sem voru 10 prósent.

Sigurður G. Guðjónsson segir að hluti af þeim brotum sem Sigurjón sé grunaður um séu viðskipti í gegnum „strúktúr" aflandsfélaga sem hafi verið teiknaður upp af Gunnari Þ. Andersen, núverandi forstjóra FME, meðan hann starfaði fyrir bankann.

Fjármálaeftirlitið gerir athugasemdir við þessi orð Sigurðar. Gunnar hafi setið í stjórnum aflandsfélaga en það félag sem hann hafi haft aðkomu að hafi ekkert haft með kaupréttarkerfi starfsmanna Landsbankans að gera.