KSÍ að missa Lagerbäck til Austurríkis?

Svo virðist sem að Svíinn Lars Lagerbäck sé í þann mund að taka við landsliðsþjálfarastarfi Austurríkis. Sænskir fjölmiðlar fullyrða að hann sé nú staddur í Vínarborg til að ganga frá samningum.

Lagerbäck hafði áður sagt í samtali við Fréttablaðið að hann væri í til í viðræður við KSÍ um starf landsliðsþjálfara. Síðan þá hafa forráðamenn KSÍ ítrekað fullyrt að viðræður væru ekki hafnar við neinn um starfið.

Lagerbäck var landsliðsþjálfari Svía frá 1998 til 2009 en stýrði landsliði Nígeríu á HM 2010. Hann kom Svíum á fimm stórmót í knattspyrnu í röð.

Hann hafði einnig verið orðaður við landsliðsþjálfarastarfið í Wales áður en Gary Speed var ráðinn.