Kristinn dæmir í Madrid á fimmtudaginn

Kristinn Jakobsson verður í eldlínunni í Evrópudeildinni á fimmtudaginn. Hann dæmir þá leik Atletico Madrid frá Spáni og Rennes frá Frakklandi en leikurinn er í lokaumferð riðlakeppni Evrópudeildar UEFA.

Leikið verður á Estadio Vicente Calderón í Madrid en þessi félög eru bæði I riðli. Atletico Madrid er með 10 stig á toppi riðilsins, hefur þegar tryggt sig áfram í 32 liða úrslitin og dugar jafntefli til þess að tryggja sér efsta sætið í riðlinum. Rennes hefur aðeins fengið 3 stig og á ekki möguleika á því að komast áfram.

Kristni til aðstoðar verða þeir Jóhann Gunnar Guðmundsson og Gunnar Sverrir Gunnarsson. Fjórði dómari verður Erlendur Eiríksson og aukaaðstoðardómarar eru þeir Magnús Þórisson og Þóroddur Hjaltalín.