Ekkert bólar á siðareglum forsetans

Forsetinn hefur ekki enn sett sér siðareglur þrátt fyrir gagnrýni og ábendingar í skýrslu rannsóknarnefndar Alþingis. Forsætisráðherra átti langan fund með forsetanum í síðustu viku til að ræða framgöngu hans að undanförnu.

Engum dylst að kaldir vindar hafa blásið milli forsetans og ríkisstjórnarinnar. Fundir ríkisráðs geta verið vettvangur fyrir ráðherra að gera athugasemdir við framkomu og embættisfærslur forsetans, en ríkisráð fundaði í gær á Bessastöðum. „Þessi mál komu ekkert til tals þar. Ég hafði í síðustu viku átt langt og ítarlegt samtal við forseta Íslands þar sem voru hreinskiptnar umræður. Og við fórum vel yfir þessi samskipti milli stjórnvalda og forsetaembættisins. Það er ekkert meira um það að segja, enda ríkir trúnaður um fundi okkar forseta," segir Jóhanna Sigurðardóttir, forsætisráðherra.

Í skýrslu rannsóknarnefndar Alþingis voru gerðar aðfinnslur við framgöngu forsetans í útrásinni og lagt var til að embættið setti sér siðareglur. Forsætisráðherra ritaði forsetanum bréf á síðasta ári og spurði hvort slíkar reglur hefðu verið settar en í svari forseta kom fram að hann teldi sér ekki skylt að setja slíkar reglur. Og í einu svarbréfi embættis hans sagðist hann líta svo á að bréf forsætisráðherra byggðist á „margháttuðum misskilningi," eins og það var orðað.

Jóhanna segst ekki hafa blandað sér meira í þetta mál eftir að hafa ritað embættinu bréf þegar skýrslan kom út. „Ég beindi spurningum til forsetaembættisins um hvernig að því yrði staðið og forsetinn taldi að það væri rétt að hann snéri sér til Alþingis með það og eftir það hef ég ekki haft frekari afskipti af þessu máli," segir Jóhanna. Aðspurð hvort hún telji rétt og eðlilegt að settar verði slíkar siðareglur fyrir embætti forseta segist hún ekki vilja svara því, en segist taka undir þau sjónarmið sem fram komi í skýrslu rannsóknarnefndar Alþingis.

Örnólfur Thorsson, forsetaritari, sagði í samtali við fréttastofu í dag að hvorki forsetinn né embætti hans hefðu sett sér siðareglur. Hann vildi að öðru leyti ekki tjá sig um málið. thorbjorn@stod2.is