Vilja aðgerðir vegna HIV sýkinga

Sóttvarnarráð vill að skimað verði í auknu mæli fyrir HIV-sýkingum, svo sem meðal ófrískra kvenna, fanga, fíkla og á húð- og kynsjúkdómadeild, til að koma í veg fyrir frekari útbreiðslu sjúkdómsins.

Sóttvarnarráð hittist í gær til að ræða fjölgun HIV sýkinga hér á landi. Læknar hafa þungar áhyggjur af þróuninni en það sem af er árinu hafa sautján greinst með HIV. Af þeim eru flestir sprautufíklar.

Sóttvarnarráð sendi eftir fundinn velferðarráðherra tillögur um hvernig best sé að bregðast við til að koma í veg fyrir frekar útbreiðslu sjúkdómsins. Á meðal þess sem ráðið leggur til er að er að gera sprautur og nálar aðgengilegri fyrir fíkla. Til að mynda með því að styrkja verkefni Reykjavíkurdeildar Rauða krossins sem rekur bíl sem leitar uppi staði þar sem fíkniefnaneytendur halda til að auðvelda þeim að fá nýjar nálar.

Þá vill ráðið að aðgengi að smokkum verði bætt og þeir gerðir ódýrari. Það eru náttúrulega ýmsar leiðir til þess sem að stjórnvöld munu örugglega skoða. Annað hvort að niðurgreiða þá eða fella niður virðisaukaskatt eða eitthvað þess háttar og síðan hafa þá á stöðum þar sem ungt fólk getur auðveldlega náð til þeirra.

Sóttvarnarráð telur ástæðu til að skima í auknu mæli fyrir HIV-smiti.

„Við erum að mæla með því að þetta verði gert betur í mæðraverndinni. Það á að bjóða öllum ófrískum konum mótefnamælingar fyrir HIV. Því miður er ekki nema tæplega helmingur sem að er prófaður," segir Haraldur Briem sóttvarnarlæknir.

Þá segir Haraldur einnig mikilvægt að auka skimanir á meðferðastofnunum og í fangelsum en í dag er fangar ekki skimaðir fyrir HIV-smitum.

„Við viljum gjarnan gera það að þetta sé húð- og kynsjúkdómadeildum, þetta sé í mæðraverndinni, þetta sé í fangelsum og víðar," bætir hann við.