Vestmannaeyjabær mun leggja fram 10-12 milljónir í nýja stúku

Ákveðið var á fundi bæjarstjórnar Vestmannaeyja í gær að jafna framlag Knattspyrnusambands Íslands til byggingu nýrrar stúku við Hásteinsvöll, um 10-12 milljónir króna. Kom þetta fram á Eyjafréttum í dag.

ÍBV hefur verið á undanþágu frá leyfiskerfi KSÍ hvað varðar aðstöðu áhorfenda á heimavelli sínum en fresturinn sem gefinn var til að koma þeim málum í lag rennur út fyrir næsta tímabil.

Framkvæmdarstjóri ÍBV lýsti þeirri skoðun sinni í kvöldfréttum Stöðvar 2 fyrr í mánuðinum að hann teldi það ekki mikið mál fyrir bæjarfélagið að koma til móts við félagið um byggingu stúkunnar. „Einn þriðji af kostnaði við byggingu stúkunnar er 27-28 milljónir sem mér finnst ekki svakalega mikið fyrir bæjarfélag sem á í sjóðum síðum tæpar fjögur þúsund milljónir,“ sagði hann.

Elliði Vignisson, bæjarstjóri ÍBV, svaraði því í viðtali á Vísi degi síðar. „Það hljóta allir að sjá að hvorki Tryggvi Már né KSÍ skrifa tékka út úr bæjarsjóði," sagði hann meðal annars en viðtölin má lesa og sjá í heild sinni hér fyrir neðan.

Meirihluti bæjarstjórnar lagði fram tillögu í gær um að leggja fram jafn mikið til stúkunnar og KSÍ gerir, um 10-12 milljónir króna. Var hún samþykkt með fjórum atkvæðum meirihlutans.

Fram kemur í greinargerð með tillögunni að með þessu sé aðkoma bæjaryfirvalda að þessu máli rausnarleg. Fulltrúar minnihlutans segja þó framlagið ekki nóg og að nær væri að fara betur yfir málið með forráðamönnum ÍBV til að leysa stúkumálið svokallaða, eftir því sem fram kemur í frétt Eyjafrétta.