Umfjöllun: Háspennu jafntefli í Krikanum

Matthías Vilhjálmsson tryggði FH 1-1 jafntefli á móti Fram á 90. mínútu í leik liðanna á Kaplakrikavelli í kvöld þar sem dramatíkin var mikil á lokamínútunum. FH-ingar töpuðu þarna dýrmætum stigum í toppbaráttunni en Framarar halda áfram að ná í stig út úr sínum leikjum.

Varamaðurinn Orri Gunnarsson kom Fram í 1-0 á 87. mínútu eftir glæsilegan sprett frá Steven Lennon og það stefni í óvæntan sigur Fram. Matthías Vilhjálmsson náði hinsvegar að jafna leikinn þremur mínútum síðar eftir stórsókn FH-inga.

Jafntefli voru líklega sanngjörn niðurstaða en bæði lið þurftu á stigunum að halda á sitthvorum enda töflunnar.

Jafnræði var með liðunum lengst af og skiptust liðin á að sækja megnið af leiknum. Atli Viðar Björnsson framherji FH-inga nagar sig þó eflaust duglega í handarbökin eftir að hafa brennt af tveim bestu færum leiksins.

Fyrri hálfleikur í Hafnarfirði var afspyrnuslakur og vægast sagt tíðindalítill. Það fór meira fyrir baráttu og djöfulgangi heldur en fallegum fótbolta.

Þrátt fyrir að liðin væri á sitt hvorum enda töflunnar mátti það ekki greina á leiknum. Framarar voru síst lakari aðilinn og byrjuðu þeir seinni hálfleik mikið mun betur. Meðal annars átti Samuel Hewson skot í stöng úr aukaspyrnu.

FH-ingar færðu sig þó aðeins upp á skaftið eftir því sem leið á seinni hálfleikinn og átti Atli Viðar Björnsson meðal annars 2 dauðafæri sem fóru forgörðum.

Það voru því þeim mikil vonbrigði þegar varamaðurinn Orri Gunnarsson kom gestunum yfir á 87 mínútu. Orri sem skoraði sitt fyrsta meistaraflokksmark kláraði færi sitt vel inn í teig eftir glæsilegan undirbúning Stevens Lennon utan af hægri kanti.

FH-ingar gáfust ekki upp við þetta og hófu strax stórsókn. Eftir að Ögmundur í marki Framara hafði varið glæsilega skot Guðmundar Sævarssonar í horn náðu heimamenn að jafna. Í kjölfarið á horninu barst boltinn til Matthíasar Vilhjálmssonar sem skoraði af stuttu færi og jafnaði leikinn í 1-1. Skömmu síðar flautaði Þorvaldur Árnason dómari til leiksloka.

Niðurstaða leiksins 1-1 og mátti í raun hvorugt liðið við því að missa stig í baráttunni sem framundan er. Framarar geta borið höfuðið hátt því þrátt fyrir að vera töluvert fjarri FH-ingum á töflunni gáfu þeir þeim ekkert eftir.

Það er greinilegt á öllu að leikmenn Fram hafa nú öðlast trú á því sem þeir eru að gera og hefur koma nýrra manna í liðið gert þeim gott. Steven Lennon einn af nýju mönnunum spilaði mjög vel í framlínunni og var sívinnandi. Þrátt fyrir smæð þá býr hann yfir miklum styrk auk þess hann er útsjónarsamur og kvikur. Með slíka ógn fram á við er leikur liðsins allt annar.

FH-ingar sem spiluðu KR-inga sundur og saman í síðustu umferð sýndu ekki viðlíka frammistöðu að þessu sinni. Þeir djöfluðust og börðust þó en sendingar voru mistækar og liðið náði sjaldan að bjóða upp á árangursríkan sóknarleik. Leikurinn hefði þó líklegast orðið allt annar ef Atli Viðar Björnsson hefði tekið með sér markaskónna. Atli fór illa með færin sín í kvöld og þegar upp er staðið kostaði það FH-inga öll stigin.

Með jafntefli í kvöld eru FH-ingar nánast úr leik í titilbaráttunni og við tekur barátta um að tryggja 3 sætið. Staða Framara er ennþá erfið en með viðlíka spilamennsku eins og í kvöld ættu þeir að geta horft björtum augum fram á veginn.