Ákærður fyrir að eyðileggja húsið sitt - og svíkja fé út úr fólki

Dómsmál gegn Birni Braga Mikkelssyni var þingfest í Héraðsdómi Reykjaness í morgun en Björn Bragi mætti ekki í þingfestinguna. Björn er meðal annars ákærður fyrir að eyðileggja húsið sitt á Álftanesi í júní árið 2009. Húsið var í eigu Frjálsa fjárfestingabankans.

Björn Bragi skemmdi einbýlishúsið sitt með beltagröfu á þjóðhátíðardaginn fyrir tveimur árum síðan. Málið þótti vera miskunnarlaus birtingamynd afleiðinga bankahrunsins.

Í viðtali við Fréttablaðið nokkrum dögum eftir að hann eyðilagði húsið, sagði hann að ástæðan hafi verið sú að annars hefði hann þurft að afsala húsinu í hendur sýslumannsins.

En Björn er einnig ákærður fyrir fjársvik, skilasvik og meiriháttar bókhaldssvik. Þá er hann sakaður um að hafa svikið par um sjö milljónir króna sem þau greiddu inn á reikning félags í hans eigu. Greiðslan var vegna einingahús. Greiðslan átti að fara til framleiðanda í Finnlandi en þangað barst hún aldrei.

Þá er Björn einnig ákærður fyrir að svíkja fjórar milljónir með sama hætti af öðrum manni. Greiðslur fólksins fóru inn á reikning félags Björns Braga en fjármunir á þeim reikningi voru ýmist nýttir í rekstur félagsins eða í persónuleg útgjöld ákærða, áður en það var að lokum tekið til gjaldþrotaskipta að því er greinir frá í ákæruskjali.

Í viðtali við Vísi sumarið 2009 var hann inntur eftir meintum fjársvikum gagnvart viðskiptavinum sínum.

Björn sagði þá að hann hefði ætlað að selja húsið sitt til þess að bæta fyrir tjónið sem hann olli. Eignarhlutur hans í húsinu hafi hinsvegar horfið þegar gengi krónunnar hrundi. Hann segist hafa átt rúmar 35 milljónir í húsinu áður en allt hrundi.

Um parið sem Vísir ræddi við sagði Björn: „Þetta er toppfólk. Þvílíkt fyrirmyndarfólk en ég veit ekki hvað ég get gert fyrir þau skilurðu? Ég er ekki búinn að hafa það gott yfir þessu góða fólki."