Telur dómstóla vanhæfa í Guðmundar- og Geirfinnsmálinu

Dómstólar eru vanhæfir til að fjalla aftur um Guðmundar- og Geirfinnsmálið. Óháð rannsókarnefnd þurfi að rannsaka málið í heild sinni. Þetta segir blaðamaður sem rannsakaði Guðmundar- og Geirfinnsmálið og kallar það samvisku þjóðarinnar.

Sigursteinn Másson skrifaði og framleiddi þáttinn Aðför að lögum árið 1996 ásamt Einari Magnúsi Magnússyni. Þátturinn sem fjallaði um Guðmundar- og Geirfinnsmálið vakti mikla athygli en nú, um 15 árum síðan, er staðan í málinu, sem Sigursteinn kallar samvisku þjóðarinnar, í raun óbreytt.

„Ég held að þetta mál risti mjög djúpt vegna þess að þjóðin skilur að málið er meingallað. Það vantar auðvitað í þetta mál lík þeirra sem áttu að hafa verið myrtir, það vantar öll sönnunargögn og vitnisburðir sem voru til grundvallar sakfellingu voru allir dregnir til baka," segir Sigursteinn.

Þjóðin skilji því að allur málatilbúnaðurinn sé gallaður og rangir dómar hafi fallið. Mikilvægt sé að stofna rannsóknarnefnd sem fari yfir málið í heild sinni. Krafan um slíka rannsókn hefur verið hávær eftir fráfall Sævars Ciesielski í síðustu viku.

Spurður hvort það sé of seint svarar Sigursteinn: „Ég held það sé í það síðasta. Sævar er látinn. En gagnvart honum og öðrum sakborningum, þeim sem lentu í þessu máli, þá skuldum við öll þessu fólki það að þessi mál verði löguð eftir því sem hægt er."

Farið verði í saumana á þeim dómum sem féllu, málarekstrinum sjálfum og hvernig farið var með sakborningana í gæsluvarðhaldi. „Þetta verður allt saman að skoða núna og við skuldum þessu fólki að gera það sómasamlega og það verður ekki öðruvísi gert en að fara framhjá dómsstólunum af því að þeir hafa sýnt það á þessum árum og áratugum að þeim er ekki treystandi til að afgreiða þetta mál."