Skagamenn komnir með tólf stiga forskot í 1. deildinni

Skagamenn unnu 6-0 stórsigur á Þrótti, liðinu í 4. sæti, á Valbjarnarvelli í fyrsta leik 13. umferðar 1. deildar karla í kvöld og náðu með því tólf stiga forskoti á Selfoss og 17 stiga forskoti á liðin í 3. og 4. sæti.

Það styttist því óðum í það að Skagamenn geti farið að fagna sæti í Pepsi-deild karla næsta sumar en þeir hafa unnið 12 af 13 leikjum sínum í sumar og hafa enn ekki tapað leik.

Arnar Már Guðjónsson og Ragnar Leósson skoruðu mörk Skagamanna í fyrri hálfleik og í seinni hálfleik skoraði Ólafur Valur Valdimarsson tvö mörk og þeir Garry Marton og Einar Logi Einarsson skoruðu eitt mark hvor.

Upplýsingar um markaskorara eru fengnar af vefsíðunni fótbolti.net