Fáðu nýtt lag Ragnheiðar frítt - Tónleikar fyrir útvalda í kvöld

Söngkonan Ragnheiður Gröndal undirbýr um þessar mundir útgáfu næstu breiðskífu sinnar og heldur af því tilefni tónleika í Þjóðmenningarhúsinu við Hverfisgötu í kvöld. Aðdáendur söngkonunnar geta náð sér í fyrstu smáskífuna af plötunni á Tónlist.is en hún fæst þar ókeypis í takmarkaðan tíma.

Það er langt síðan Ragnheiður hefur haldið tónleika hér heima en hún hefur undanfarin misseri verið búsett í Berlín í Þýskalandi. Nú er hún aftur á móti flutt heim og verður meira áberandi á næstunni. Á morgun eru til að mynda tónleikar með henni í Þorlákshöfn.

Ragnheiður vinnur um þessar mundir að nýrri breiðskífu sem áætlað er að komi út í maí. Verða tónleikarnir notaðir til þess að leyfa fólki að heyra nýtt efni og sjá viðbrögðin við því. Ragnheiður syngur og spilar á píanó, Guðmundur Pétursson á gítar, Róbert Þórhallsson á bassa og Birgir Baldursson á trommur.

Nýja smáskífan sem er ókeypis á Tónlist.is ber heitið Wise Man Song en í því lagi nýtur Ragnheiður aðstoðar söngkvennanna Ragnhildar Gísladóttur og Sigríðar Thorlacius.

Aðeins 100 sæti eru í boði á tónleikana í kvöld svo hljómburður og töfrandi andrúmsloft Þjóðmenningarhússins njóti sín til fulls. Miðaverð er 2500 krónur en miðasala er bæði á midi.is og við innganginn. Tónleikarnir hefjast klukkan 21 en húsið opnar hálftíma fyrr.