Bæjarstjórnin komin með matsgerðina - hafa tíu daga til að taka afstöðu

Fulltrúar í bæjarstjórn Seltjarnarnesbæjar hafa fengið matsgerð tveggja dómkvaddra matsmanna sem komust að þeirri niðurstöðu að Ásgerður Halldórsdóttir, bæjarstjóri Seltjarnarnesbæjar, hafi lagt Ólaf Melsted, fyrrum framkvæmdastjóra Tækni- og umhverfissviðs hjá bænum, í einelti.

Ólafur krafðist þess í bréfi til bæjarstjórnar að Ásgerði yrði vikið úr starfi og að sér yrðu greiddar bætur fyrir meint einelti. Ólafur gaf bæjastjórninni tíu daga til að taka afstöðu til kröfunnar. Á þriðjudaginn gaf bæjarstjórnin út yfirlýsingu þess efnis að þrátt fyrir ítrekaðar óskir hafi matsgerðin ekki fengist afhent frá lögmanni Ólafs. Lögmaður hafði boðið bæjarfulltrúum aðgang að matsgerðinni á skrifstofu sinni undir sérstöku eftirliti fulltrúa lögmannsstofunnar.

„Á meðan matsgerðin fæst ekki afhent óskilyrt telur bæjarstjórn sér ekki fært að taka málefnalega og sanngjarna afstöðu til krafna starfsmannsins,“ sagði í tilkynningu frá bæjarstjórninni á þriðjudaginn.

Nú hefur lögmaður Ólafs, Jóhann H. Hafstein, afhent bæjarstjórninni matsgerðina. „Við gátum ekki verið að standa í einhverjum leik með þeim að þetta gæti verið niðurstaðan, að þeir gátu ekki tekið afstöðu til kröfunnar. Við vorum búnir að senda þeim niðurstöðukaflann þar sem það kom skýrt fram að hann var lagður einelti,“ segir Jóhann.

„Þeir voru með þann útúrsnúning að þeir vildu sjá skýrsluna í heild sinni og vildu ekki koma til mín og skoða hana, þetta breytir svo sem engu um niðurstöðuna því hún hefur komið fram áður,“ segir hann.

En fulltrúar bæjarstjórnarinnar fengu matsgerðina afhenta í gær. „Þeir eru nú með skýrsluna í heild sinni og hafa frest til 28. mars til að taka ákvörðun um hvort þeir víkji bæjarstjóranum úr starfi og greiði bætur til Ólafs,“ segir Jóhann ellegar fari þeir með málið fyrir dómstóla.

Ekki náðist í Guðmund Magnússon, forseta bæjarstjórnar, við vinnslu fréttarinnar.