„Tökum ekki stjórnlagaþingið frá þjóðinni“

Jóhanna Sigurðardóttir forsætisráðherra segir ekki koma til greina að hætta við stjórnlagaþingið. Jóhanna flutti munnlega skýrslu um þá stöðu sem nú er komin upp eftir að Hæstiréttur lýsti kosningu til stjórnlagaþings ógilda. Hún fór yfir ástæðurnar sem Hæstiréttur taldi grundvöllur fyrir ógildingu og benti á að fyrst og fremst væri fundið að vinnulagi við framkvæmd kosninganna en ekki lögin sjálf. Hún benti á að ekkert af þeim atriðum sem Hæstiréttur tilgreindi hafi komið fram sem raunveruleg vandamál við framkvæmdina.

Jóhanna sagði að næstu skref í málinu verði þau að forsætisnefnd Alþingis fundi sem fyrst með Landskjörstjórn og öðrum þeim sem að framvkæmdinni stóðu.

Að hennar mati eru þrír kostir í stöðunni: Að hætt verði við stjórnlagaþingið, sem henni finnst ekki koma til greina. Í öðru lagi að ágallarnir verði leiðréttir og kosið að nýju, með tilheyrandi kostnaði. Þriðja lausnin væri síðan sú að Alþingi verði veitt heimild til þess að kjósa 25 fulltrúa á stjórnlagaþing, mögulega þá sömu og náðu kosningu í nóvember.

Hún sagði ennfremur að án efa væru fleiri leikir í stöðunni. „En við hljótum að leita allra leiða til að þetta verði klárað," sagði ráðherrann og bætti við að hún vonaðist til að menn fari ekki að „nýta þessa uppákomu til þess að slá pólitískar keilur."

"Stjórnlagaþingið tökum við ekki frá þjóðinni," sagði Jóhanna að lokum.