Úrslitastundin í dag

Gengið verður frá kjarasamningum Alþýðusambandsins (ASÍ) og Samtaka atvinnulífsins (SA) í dag. Hvort samningarnir verða til nokkurra vikna eða þriggja ára ræðst af því hvort samkomulag næst í dag við ríkisstjórnina um sjávarútvegsmál, samgönguframkvæmdir og fleiri mál, samkvæmt heimildum Fréttablaðsins.

Eftir því sem blaðið kemst næst hljóðar fyrirkomulag launahækkana í þriggja ára kjarasamningi upp á 50.000 króna eingreiðslu strax og tíu til ellefu prósenta launahækkun í áföngum á þriggja ára samningstíma, þar af fjögur prósent 1. júní næstkomandi.

Ef ekki næst samkomulag við stjórnvöld í dag verða að öllum líkindum gerðir skammtímasamningar til 15. júní. Einu launabreytingar verða þá 50.000 króna eingreiðsla.

Gylfi Arnbjörnsson, forseti ASÍ, segir ekkert annað liggja fyrir en að í dag verði gerðir samningar. „Það er klárt að kjarasamningar verða gerðir fyrir lok dags, hvort sem þeir verða til skemmri eða lengri tíma,“ segir Gylfi.

Samningamenn funduðu í gær fram á kvöld og var að sögn ágætur andi í viðræðunum. Leiðtogar stjórnarflokkanna funduðu með fulltrúum í gærmorgun og segist Gylfi þar hafa fengið þau svör sem hann beið eftir. „Okkur fannst við fá alvöru svör, en nú viljum við fá að sjá þau í texta,“ segir Gylfi.

Vilmundur Jósefsson, formaður SA, er hóflega bjartsýnn á að samkomulag um langtímasamninga náist í dag. Hann segir fundinn með fulltrúum ríkisstjórnarinnar þó ekki hafa skilað miklum árangri og enn þurfi að semja um fjölmörg atriði. Ríkisstjórnin sé enn ekki reiðubúin að gera nóg varðandi samgönguframkvæmdir.

Steingrímur J. Sigfússon fjármálaráðherra kom á fund samningamanna í Karphúsinu seinnipartinn í gær og ræddi áform um orkuvinnslu og orkufrekan iðnað. Ráðherra benti mönnum þar á ársfund Landsvirkjunar í dag og að þar yrðu tíðindi af framtíðaruppbyggingu í orkumálum.

„Þetta veitti okkur meiri bjartsýni. Ef fleiri mál gengju svona væri hægt að líta bjartari augum fram á veginn,“ segir Vilmundur. Miklar áhyggjur eru meðal SA af þeirri óvissu sem ríkir nú um lánshæfismat Íslands og þar af leiðandi forsendur fyrir fjármögnun stórframkvæmda og annarra fjárfestinga.

„Við erum að leita að lausnum sem hægt er að byggja á en í mörgum málum er einfaldlega ekki hægt að finna málamiðlanir,“ segir Vilmundur. „Málin verða kláruð á annan hvorn veginn. Við getum ekki verið að velkjast með þetta lengur.“- sv