Afmælishátíð Party Zone um helgina

Á laugardagskvöld verður haldin vegleg hátíð á Nasa í tilefni af 20 ára afmæli útvarpsþáttarins Party Zone. Þar verður mikið um dýrðir og ætlunin er að fagna og hampa síðustu 20 árum danstónlistarinnar.  

„Plötusnúðar og listamenn kvöldsins undirbúa nú hálfgerða slagaraveislu þar sem hver danstónlistarslagarinn og klassíkerinn verður látinn flakka án þess þó að gleyma nútímanum enda nóg um að vera í danstónlist nútímans,“ segir í tilkynningu.

Gera má ráð fyrir að stór hluti plötusnúða landsins mæti á þetta kvöld ásamt unnendum þáttarins í gegnum árin. Á Facebook-síðu fyrir hátíðina er nú þegar komin skemmtileg stemmning þar sem plötusnúðarnir metast um það hver eigi besta uppáhaldssmellinn.

Gus Gus, Human Woman og breski plötusnúðurinn Rhythmdoctor halda uppi fjörinu á Nasa. Einnig verður sérstakt PZ20 viðhafnarsett frá Margeiri og Árna E ásamt öðrum PZ-plötusnúðum síðustu ára. Gleðin hefst með boðspartýi fyrir velunnara þáttarins kl.22 um kvöldið en opnar fyrir almenning kl.23. Forsala miða á afmælishátíðina fer fram á midi.is og í verslunum Skífunnar.

Party Zone hefur oft verið nefndur dansþáttur þjóðarinnar. Hann byrjaði á öldum ljósvakans haustið 1990 og hefur séð til þess að landinn fái sinn skammt af danstónlist allt frá því að rave-tímabilið var og hét. Þátturinn hefur undanfarin misseri staðið vaktina á Rás 2 en áður sleit þátturinn barnsskónum áf framhaldsskólastöðinni Útrás áður en hann flutti sig yfir X-ið þar sem hann var á árunum 1993 til 1998.

Nánari upplýsingar má finna hér.