FIFA leiðréttir Dómaranefnd KSÍ - víti Halldórs Orra var ólöglegt

Dómaranefnd KSÍ hafði ekki rétt fyrir sér þegar hún gaf frá sér yfirlýsingu um að vítið, sem Halldór Orri Björnsson tók fyrir Stjörnuna á móti FH í 20. umferð Pepsi-deildar karla, hafi verið löglegt. Dómaranefnd FIFA var send „klippa" af atvikinu og hefur hún sent KSÍ sitt álit.

Hér á eftir fylgir íslensk þýðing á svarinu sem barst frá Dómaranefnd FIFA en það er hægt að sjá vítið í "Brot af því Besta" inn á Vísi eða með að smella hér.

„Þetta er ekki löglegt! Leikmaðurinn klárar atrennu sína - og þykist síðan ætla að skjóta í þeim tilgangi að blekkja markvörðinn. Það er ekki löglegt - honum er heimilt að taka „gabbhreyfingar" í atrennu sinni, en alls ekki þegar hann hefur lokið atrennunni.

Því bar að endurtaka vítaspyrnuna (af því að hann skoraði) - og áminna leikmanninn fyrir óíþróttamannslega framkomu".

Þessari leiðréttingu er hér með komið á framfæri enda skylt að hafa það sem sannara reynist. Nefndin biðst velvirðingar á hvatvísi sinni," segir í frétt á heimasíðu KSÍ.

Þóroddur Hjaltalín Jr. dæmdi vítið gilt og það gæti skipt máli i baráttu Halldórs Orra um markakóngstitilinn í Pepsi-deildinni. Þetta var þrettánda mark hans á tímabilinu en hann hefur aðeins skorað einu marki minna en Alfreð Finnbogason sem verður í leikbanni í lokaumferðinni.