Fargjöld hjá Strætó hækka - stakt fargjald í 350 krónur

Stjórn Strætó bs. hefur samþykkt að hækka fargjöld í fyrsta sinn frá því í janúar 2007. Í tilkynningu frá fyrirtækinu segir að þetta sé gert til þess að mæta rýnandi fargjaldatekjum. Þær hafa dregist saman um helming að raunvirði frá stofnun Strætó bs. árið 2001þar sem fargjöld hafa ekki haldið í við almenna verðlagsþróun frá þeim tíma. Hækkunin tekur gildi um áramót og eftir hana mun stakt fargjald kosta 350 krónur og stök barnafargjöld verða afnumin.

Við þetta bætist að eigendur Strætó, sveitarfélögin á höfuðborgarsvæðinu, munu draga úr framlögum sínum til Strætó bs. á næsta ári en gert er ráð fyrir fimm prósenta lækkun. „Þar sem framlög eigendanna eru um 83% af tekjum Strætó bs. þýða minni framlög að hagræða þarf í rekstri. Til að mæta því verður dregið úr þjónustu á þeim tíma sem fæstir nota strætó."

„Fargjöld Strætó munu hækka á bilinu 5% til 25% og lagt er upp með að hækkunum sé stillt í hóf hjá þeim sem nota strætó mest, þ.e. þeim sem nýta sér tímabilskort Strætó," segir ennfremur. „Slík kort munu hækka á bilinu 14,2% til 14,8%. Minnst hækkun verður á 20 miða kortum barna og ungmenna, en mest verður hækkunin á staðgreiðslu þar sem greiðsla fyrir eitt fargjald mun hækka úr 280 kr. í 350 kr. Þetta er fyrsta gjaldskrárhækkun Strætó bs. frá janúar 2007, en frá þeim tíma hefur vísitala neysluverðs hækkað um u.þ.b. 37%. Hækkunin mun taka gildi um næstu áramót."

Þá segir að ákveðin kerfisbreyting verði gerð á fargjöldum 6 - 18 ára. „Þessi aldurshópur mun ekki lengur geta keypt stakt fargjald í strætisvögnum á sérstöku verði, en sú nýjung var tekin upp árið 2007 að börn og ungmenni gátu keypt staka ferð á 100 krónur. Börnum og ungmennum mun hins vegar áfram bjóðast sérstök 20 miða kort, þar sem börn 6-12 ára greiða 40 krónur fyrir ferðina (6,7% hækkun) og ungmenni 12-18 ára 105 krónur fyrir ferðina (5% hækkun). Jafnframt verður gerð sú breyting að afsláttur eldri borgara mun miðast við 70 ára aldur í stað 67 áður."