Mourinho: Verð áfram hjá Inter næsta vetur

José Mourinho, þjálfari Inter, réð sér engan veginn fyrir kæti í kvöld er lið hans, Inter, gerði sér lítið fyrir og sló Barcelona út úr Meistaradeild Evrópu. Hann var svo kátur að hann lýsti því yfir að hann verði áfram hjá félaginu næsta vetur.

„Ég get lofað því að ég verð áfram hjá þessu félagi næsta vetur. Ég spila alltaf gegn Barcelona og það gerist alltaf eitthvað merkilegt. Það er ekkert nýtt fyrir mér. Nú vil ég sjá stuðningsmenn félagsins taka á móti okkur á flugvellinum," sagði Mourinho afar kátur eftir leik.

„Ég verð að viðurkenna að tilfinningin núna er betri en að vinna sjálfa Meistaradeildina. Stuðningsmenn félagsins veittu okkur líka kraft í kvöld þegar á þurfti að halda."