Enn dregið úr niðurskurði

Útgjöld ríkissjóðs til velferðarmála aukast um rúmlega einn milljarð króna frá því sem áður stóð til. Meirihluti fjárlaganefndar gekk í gærkvöldi frá breytingatillögum við frumvarpið en lokaumræða þess er á dagskrá þingsins í dag. Meðal þess sem breytist er að 350 milljónum króna verður varið til verðbóta á grunn ellilífeyris- og örorkubóta.

Dregið er úr aðhaldskröfu á heilbrigðisstofnanir um sem nemur nokkur hundruð milljónum. Heilbrigðisstofnanirnar á Húsavík og Sauðárkróki og Heilsustofnun Náttúrulækningafélags Íslands í Hveragerði þurfa til dæmis að skera talsvert minna niður en áður var áætlað.

Þá eru framlög til atvinnuleysis­bóta aukin um 180 milljónir í tengslum við fyrirhugaðar breytingar á lögum um bæturnar.

Hækkun vaxtabóta sér einnig stað í frumvarpinu en hún grundvallast á samkomulagi stjórnvalda, fjármálastofnana og lífeyrissjóða um aðgerðir fyrir skuldsett heimili. Verður sex milljörðum króna varið til málaflokksins umfram það sem áður var ákveðið en fjármálastofnanir taka þátt í kostnaðinum.

Á fundi fjárlaganefndar í gærkvöldi varð að samkomulagi að nefndin öll leggi til að hafin verði á næsta ári bólusetning við leghálskrabbameini í tólf ára stúlkum. 50 milljónum króna verður varið til verkefnisins á næsta ári og meiru eftir það.

Fátítt er að fjárlagafrumvarp taki miklum breytingum milli annarrar og þriðju umræðu og þess raunar dæmi að engar breytingar hafi verið gerðar fyrir lokaumræðuna. Frumvarpið tók umtalsverðum breytingum milli fyrstu og annarrar umræðu. Til dæmis var dregið úr niðurskurði til heilbrigðismála um 1,3 milljarða króna og framlög til menntamála aukin um rúmlega hálfan milljarð.

Allur gærdagurinn fór í að smíða lokaútgáfu tillagnanna. Áður en kom til fundar fjárlaganefndar í gærkvöldi voru haldnir fundir í þingflokkum stjórnarflokkanna. Hvorki Lilja Mósesdóttir né Atli Gíslason, sem bæði höfðu gagnrýnt áætlanir um niðurskurð, sátu fund VG. Lilja sat hjá í atkvæðagreiðslu um fjárlagafrumvarpið eftir aðra umræðu. Innan þingflokks VG er ekki reiknað með stuðningi hennar við lokaafgreiðsluna.

Með breytingunum nú er einkum reynt að koma til móts við gagnrýni og athugasemdir sem fjárlaganefnd höfðu borist en ekki tekið sérstakt tillit til sjónarmiða einstakra þingmanna, hvorki Lilju né annarra.

- bþs