Kaninn tekinn úr sambandi - sakar Lýðvarpið um árás á útvarpssendi

„Ég áttaði mig á því stuttu eftir hádegi að sendir á okkar vegum í Bláfjöllum var dottinn út," segir Einar Bárðarson, útvarpsstjóri Kanans, en óprúttnir aðilar virðast hafa brotist inn í hús þar sem sendirinn er og tekið hann úr sambandi með þeim afleiðingum að útsending útvarpsstöðvarinnar þagnaði.

„Þegar ég grennslaðist fyrir um málið komst ég að því að fulltrúar frá Lýðvarpinu, þar á meðal Ástþór Magnússon, fóru að sendinum í Bláfjöllum og slökktu á honum," segir Einar en Kaninn sendir út á tveimur bylgjulengdum. Önnur þeirra er sú sama og Lýðvarpið var með. Kananum var úthlutað tíðnin af Póst- og fjarskiptastofnun þegar Lýðvarpið hætti.

„Ef þetta reynist allt saman rétt þá verður þetta að sjálfsögðu kært til lögreglunnar," segir Einar sem er steinhissa á stöðu mála en sjálfur var hann á leiðinni að sendinum til þess að kanna aðstæður þegar blaðamaður ræddi við hann.

Hann segir sína menn afar ósátta við þessar sérkennilegu aðgerðir og bendir á að ef einhverskonar ósætti hafi verið um að ræða, en sjálfum var honum ekki kunnugt um slíkt, þá hefði mönnum verið í lófa lagið að hafa samband við sig.

„Ég hef til að mynda átt í góðum samskiptum við Ástþór í gegnum tíðina," segir Einar og bætir við: „Það er kannski dálítið kaldhæðnislegt í ljósi þessara atburða að samskiptin voru einmitt í lagi."