Ferill Magnúsar Blöndal

Heimildarmynd Ara Alexanders Ergis Magnússonar, Orðið tónlist: Magnús Blöndal Jóhannsson, verður frumsýnd í Listasafni Íslands í kvöld klukkan 20. Magnús Blöndal var brautryðjandi á mörgum sviðum, leitandi og skapandi tónskáld og til að mynda einn sá fyrsti sem gaf sig að elektrónískum tónverkum. Ari kynntist honum á 10. áratugnum.

„Ég var næturvörður á Hótel Valhöll meðfram námi sirka 1994 og kynntist Magnúsi þá. Hann spilaði dinnermúsík á hótelinu,“ segir Ari.

„Svona tíu árum síðar voru margir búnir að fá áhuga á tónlist Magnúsar, til að mynda sýningarstjórinn Hans-Ulrich Obrist, sem ég hef verið að vinna með. Hans-Ulrich er mikill músíkáhugamaður, hefur meðal annars tekið viðtöl við Stockhausen og marga fleiri. Hann hefur stundum komið til Íslands og einu sinni þegar ég náði í hann út á flugvöll segir hann mér að hann hafi hitt Björk úti í New York og hún hafi verið að tala svo mikið um þennan Magnús Blöndal. Hans-Ulrich vildi endilega fá að hitta hann. Þá var svo langt um liðið síðan ég hafði hitt Magnús að ég var ekki einu sinni viss um að hann væri á lífi. Það var ekki um annað að ræða en að hringja í 118. Þá bjó Magnús í Hátúni og við bara beint þangað með græjurnar. Við sátum með honum í tvo tíma og fórum yfir ferilinn. Magnús fór í rosa flottan gír þegar hann komst að því hvað Hans-Ulrich var vel að sér.

Viðtalið er á ensku og er uppistaðan í þessari 52 mínútna heimildarmynd. Bjarki Sveinbjörnsson í Tónlistarsafninu í Kópavogi kemur líka mikið við sögu, hann hafði mikið af Magnúsi að segja og leitaði meðal annars uppi frumritin af verkunum hans.“

Á tæpasta vaði

Ari var heppinn að ná viðtalinu við Magnúsi Blöndal. „Þegar ég kvaddi hann sagðist ég vilja tala betur við hann um ýmislegt sem mér fannst standa út af borðinu – bæði að fá sögur af samtímamönnum eins og Jóni Leifs og heyra álit Magnúsar á íslenskri þjóðlagahefð og fleira. Við ætluðum að hittast viku seinna. Þegar ég hringdi í hann þá sagðist hann ekki vera í góðu standi og bað mig um að hringja í sig viku síðar. Þegar ég gerði það sagði hann mér að mæta bara daginn eftir. Þegar ég mætti með litla teymið mitt var hann kominn á spítala þar sem hann var í dái og lést nokkrum mánuðum seinna.“ Ekkert um einkalífið

Ari segir að það hafi ekki verið um auðugan garð að gresja þegar kom að því að finna myndefni úr sjónvarpi með Magnúsi Blöndal.

„Það eina sem ég fann var viðtal sem Kolfinna Baldvinsdóttir hafði tekið við hann fyrir þátt á Stöð 2, en hún hafði bara áhuga á því hvaða konum hann hafði verið með og hvað hann hefði drukkið mikið.“

Er ekkert um það í þinni mynd?

„Nei. Í öllum mínum myndum fókusa ég á feril fólks. Ég hef engan áhuga á því hvað þú átt mörg börn, hvaða konum þú varst með og hvað þú drakkst mikið eða lítið. Mér finnst það ekkert koma málinu við.“

Magnús Blöndal lenti í ýmsum ógöngum í einkalífinu, var nærri búinn að drepa sig á ofdrykkju og hvarf af sjónarsviðinu í tuttugu ár. Þar að auki varð hann fyrir því að konan hans datt á ofn heima hjá þeim og dó. „Magnús vann göfugt starf á Freeport eftir að hann náði sér á strik, en eins og ég segi, þá er ekkert um þetta,“ segir Ari.

Samhliða frumsýningunni í Listasafni Íslands í kvöld verða haldnir tónleikar með hljómsveitunum Stilluppsteypu og Parabólum, sem er samstarfsverkefni Sigtryggs Baldurssonar og Gísla Vignis Karlssonar. Aðgangseyrir er 1.000 krónur. Búið er að selja myndina á RÚV en ekki hefur verið ákveðið hvenær hún verður sýnd.

drgunni@frettabladid.is