Kominn í hóp með Kobe Bryant og Jack Bauer

Myndir af hasardúkkum McFarlane-fyrirtækisins úr kvikmyndinni Prince of Persia: Sand of Time eru komnar á Netið. Og þar á íslenski leikarinn Gísli Örn Garðarsson sína eigin dúkku en eins og Fréttablaðið hefur greint frá leikur Gísli skúrkinn The Vizier á móti stórleikaranum Jake Gyllenhaal og Bond-píunni Gemmu Arteton auk Bens Kingsley og Alfreds Molina.

Gísli hafði sjálfur ekki séð dúkkurnar þegar Fréttablaðið hafði uppi á honum.

„Ja hérna, ég segi nú bara ekki annað, það er ekki öll vitleysan eins í þessu lífi," voru fyrstu viðbrögð Gísla þegar þetta var borið undir hann. Eins og Fréttablaðið greindi frá stóð alltaf til að gera svona dúkkur og Gísli mun sennilega getað státað af því áður en sumarið brestur á, einn Íslendinga, að eiga bæði sína eigin McFarlane-dúkku og Lego-karl því danska kubbafyrirtækið er á fullu við að undirbúa útgáfu á Lego-körlum upp úr kvikmyndinni. „Ég er reyndar búinn að sjá Lego-karlinn og hann er mjög flottur." McFarlane-fyrirtækið er þekkt fyrir dúkkur sínar og hefur meðal annars gert dúkkur af þekktustu leikmönnum NBA og persónum úr sjónvarpsþáttunum 24 og The Simpsons.

Kvikmyndin sjálf verður frumsýnd í lok maí í Bandaríkjunum en Gísli segist ekki hafa hugmynd um hvernig hlutverki hans verði háttað í tengslum við markaðssetningu myndarinnar.

„Nei, þeir hafa ekkert verið duglegir að hafa samband, þeir hjá Disney, og upplýsa mann um framgang mála," segir Gísli. Bundnar eru miklar vonir við myndina þar vestra og jafnvel reiknað með að svipað æði ríði yfir Bandaríkin og þegar sjóræningjamyndirnar hans Johnny Depp voru nánast einráðar í kvikmyndahúsum um allan heim.

Leikarinn segist annars hlakka til að sjá myndina, það hafi verið bjart yfir henni þegar hann las handritið.

„Þetta er bara strákamynd, bara sandur og sól, karlar að skylmast og sæt prinsessa," segir Gísli og bætir því við að sennilega megi hann reikna með því að næstu pakkar sem hann fái verði harðir.

„Já, ég er ansi hræddur um það." - freyrgigja@frettabladid.is