Ekkert heyrst frá Guðlaugi

Fréttastofa hefur frá því í morgun reynt að ná tali af Guðlaugi Þór Þórðarsyni, þingmanni Sjálfstæðisflokksins, en þrátt fyrir ítrekaðar tilraunir hefur það ekki borið árangur. Guðlaugur hefur hvorki svarað í síma né tölvupósti.

Í kjölfar ákvörðunar Steinunnar Valdísar Óskarsdóttur að segja af sér þingmennsku vegna styrkja sem hún fékk fyrir fjórum árum ákvað fréttastofa að falast eftir viðbrögðum frá Guðlaugi í ljósi þess að hann þáði 24,8 milljónir króna í styrki fyrir þingkosningarnar 2007. Samkvæmt upplýsingum frá Ríkisendurskoðunar þáði enginn hærri styrki en hann.

Þá hugðist fréttastofa spyrja Guðlaug um yfirlit yfir þá sem styrktu hann í prófkjörinu. Í Kastljósi 4. maí sagðist Guðlaugur ætla að upplýsa hverjir styrktu hann og birta það „mjög fljótlega."

Í síðasta mánuði safnaðist fólk fyrir utan heimili Guðlaugs og kallaði eftir afsögn hans. Stefanía Óskarsdóttir, stjórnmálafræðingur, segist í samtali við Morgunblaðið ekki vera í neinum vafa um að afsögn Steinunnar muni hafa áhrif þegar til lengri tíma líti. Þrýstingur á aðra stjórnmálamenn sem þáðu háa prófkjörsstyrki muni væntanlega aukast. Einar Mar Þórðarson, stjórnmálafræðingur, segir á Pressunni að ákvörðun Steinunnar setji pressu á aðra stjórnmálmenn og nefnir sérstaklega Guðlaug Þór, Helga Hjörvar, Dag B. Eggertsson og Gísla Martein Baldursson.