Uppfyllti markmið Íslandsferðar

Bretinn Ian Usher ákvað að selja líf sitt á uppboðssíðunni eBay sumarið 2008. Mánuði síðar lagði hann af stað í ferðalag um heiminn þar sem hann var ákveðinn í að uppfylla hundrað markmið á jafnmörgum vikum. Ian heimsótti Ísland stuttu fyrir jól og meðan á dvöl hans stóð hugðist hann sjá Jökulsárlón og hin margrómuðu norðurljós.

Fréttablaðið hafði uppi á Ian nú fyrir stuttu þar sem hann var staddur í Livingstone í Zamibíu og spurði hann frétta. Aðspurður segist hann bæði hafa séð Jökulsárlónið og fengið að upplifa norðurljósin, þótt þau hafi verið afskaplega dauf, og þar með uppfyllt bæði markmið sín. Auk þess heimsótti hann Gullfoss og Geysi og fór í sund í Laugardalslaug.

„Ég tók tvo daga í að skoða lónið og svæðið þar í kring. Lónið sjálft var að mestu frosið og maður heyrði hvernig brast og dundi í jöklunum inn á milli, sólin skein og það glitraði á ísinn í ljósinu. Þetta var mjög falleg upplifun. Ég sá einnig norðurljósin, en þau voru mjög dauf og ég varð hálf vonsvikinn því ég hafði séð svo fallegar myndir af þessu fyrirbæri,“ segir Ian. Hann segir dvölina á Íslandi hafa verið skemmtilega og segir landið bæði heillandi og einstakt.

„Ég veit samt ekki hvort ég gæti búið þarna, kuldinn var svo mikill. Ég er meira fyrir að ganga um í stuttbuxum og sandölum,“ segir hann og hlær. Ian heimsótti fjölskyldu sína í Bretlandi um jólin og segist hafa komið mömmu sinni mikið á óvart með því að birtast óvænt heima hjá henni. Ian mun næst fljúga til Suður-Afríku og því næst til Síle þar sem hann ætlar að uppfylla enn fleiri markmið. Heimasíða Ians er www.100goals100weeks.com.- sm