Tvær nýjar frá Insol

Tónlistarmaðurinn Insol (Ingólfur Sigurðsson) gaf nýlega út tvo diska með eigin músík. Þetta eru sólódiskar númer níu og tíu og heita Það og það og Ísland skal aría griðland. Insol hóf að gefa út tónlist árið 1998 og gerði átta diska til ársins 2003. Þá fór hann í langa útgáfupásu. Í fyrra gaf Brak-útgáfan út safnplötuna Hátindar, þar sem safnað var saman átján lögum frá ferlinum. Þar má meðal annars heyra lagið þekkta, „Hvenær mun hér á Íslandi rísa stjörnusambandsstöð?“

Nýju plöturnar með Insol sverja sig í ætt við fyrri verk. Það og það var að hluta til samin í kjölfar bankahrunsins og þar má heyra beitt lög eins og „Bankafylliríið er búið“ og „Borgaðu fyrir burgeisana“. Á plötunni syngur Insol auk þess að leika á gítar, munnhörpu og hljómborð. Á Ísland skal aría griðland er hins vegar ekkert hljómborð. Insol hefur löngum pælt í kenningum dr. Helga Pjeturs og á plötuumslaginu skrifar höfundur meðal annars: „Þeir sem ekki sætta sig við þróun heimsmálanna gætu fundið á diskinum eitthvað við sitt hæfi, en væntanlega móðgast sumir sem vilja ekki að arfleifð Þriðja Ríkisins sé endurskoðuð“.

Báðir nýju diskarnir ásamt þeim eldri eru fáanlegir hjá listamanninum eða í verslunum Smekkleysu og Havaríi.