Hleb: Við verðum að grípa tækifærin þegar þau gefast

Miðjumaðurinn Alexandr Hleb hjá Stuttgart telur að þýska liðið muni fá sín tækifæri gegn Barcelona á Mercedes Benz-leikvanginum í fyrri leik liðanna í 16-liða úrslitum Meistaradeildarinnar í kvöld þrátt fyrir að Meistaradeildarmeistararnir séu vitanlega sigurstranglegri.

„Þetta er gríðarlega mikilvægur leikur fyrir félagið og fyrir stuðningsmenn þess og við verðum að vera tilbúnir. Þetta verður auðvitað erfitt þar sem Barcelona er með frábært lið en við munum fá tækifæri og við verðum að grípa þau þegar þau gefast.

Við þurfum að vera skipulagðir varnarlega og sækja svo hratt á þá og þannig eigum við möguleika á að vinna þá. Ef við spilum okkar besta leik þá getum við náð fram óvæntum úrslitum," sagði Hleb á blaðamannafundi í dag en hann er í þeirri einkennilegu stöðu að vera á láni hjá Stuttgart frá Barcelona.