Milljarða útgreiðsla hangir yfir borginni

„Á meðan við erum að forgangsraða í þágu grunnþjónustu og annars sem mestu máli skiptir getum við auðvitað ekki varið það að endurgreiða lóðir nema það sé alveg skýrt að það sé okkar skylda," segir Hanna Birna Kristjánsdóttir borgarstjóri.

Meirihlutinn í borgarráði Reykjavíkur samþykkti í gær bókun um að úrskurðir samgöngu- og sveitarstjórnarráðuneytisins þess efnis að borgin ætti að taka aftur við seldum lóðum væru byggðir á röngum forsendum og því rangir. Uppi sé lagaleg óvissa því Héraðsdómur Reykjavíkur hafi í desember komist að þveröfugri niðurstöðu en ráðuneytið. „Reykjavíkurborg hefur ekki í sínum samþykktum viðurkennt að til staðar hafi verið einhliða skilaréttur hjá lóðarhöfum íbúðahúsalóða, þar sem byggingarréttur var seldur í kjölfar útboðs, eða atvinnuhúsalóða," ítrekar meirihluti Sjálfstæðisflokks og Framsóknarflokks í bókun.

Samkvæmt framkvæmda- og eignasviði Reykjavíkurborgar frá í júní 2009 gátu hugsanleg fjárútlát borgarinnar vegna lóðaskila í Úlfarsárdal og á Sléttuvegsreit numið þremur milljörðum króna með verðbótum. Þar af hafi verið gerð krafa um 365 milljónir. Þessar upplýsingar fengust ekki uppfærðar í gær og ekki reyndist unnt að fá samsvarandi upplýsingar um atvinnulóðir. En ljóst er að upphæðin sem um er að tefla skiptir milljörðum.

Fulltrúar Samfylkingarinnar og fulltrúar meirihlutans skiptust á bókunum um málið í borgarráði en Þorleifur Gunnlaugsson, fulltrúi VG, sat hjá. „Þetta er mál sem verður leitt til lykta í Hæstarétti," segir Þorleifur við Fréttablaðið.

Dagur B. Eggertsson og aðrir fulltrúar Samfylkingarinnar í borgarráði segjast byggja afstöðu sína á sjónarmiðum jafnræðis og sanngirni. Uppi sé lagaleg óvissa og spurningar um óvandaða stjórnsýslu. Dráttur á niðurstöðu geti verið afar afdrifaríkur fyrir viðkomandi fjölskyldur. Þótt staða borgarsjóðs sé erfið sé það „þó ekki síður ábyrgðarhluti hjá borgarstjóra og meirihluta borgarstjórnar á láta viðkomandi fjölskyldunum einum eftir að axla ábyrgð," eins og segir í bókun.

Hanna Birna segir að á meðan uppi sé lagaleg óvissa fylgi borgaryfirvöld lögfræðilegri ráðgjöf. Bæði borgarlögmaður og aðrir lögmenn sem vinni fyrir borgina í þessu málum telji að ekki hvíli á borginni skylda til að taka við lóðunum. „Það er ekkert í samþykktum borgarinnar sem gerir ráð fyrir svona einhliða skilum á lóðum. Í þeim tilvikum sem borgin endurgreiddi atvinnulóðir án þess að vera skyldug til þess var það vegna þess að borgin taldi sig afdráttarlaust geta endurselt þær lóðir," segir borgarstjórinn.

gar@frettabladid.is