Glasser hitar upp á Evróputúr Jónsa

Bandaríska hljómsveitin Glasser með söngkonuna Cameron Mesi-row í fararbroddi hitar upp fyrir Jónsa í Sigur Rós á tónleikaferð hans um Evrópu sem hófst fyrir skömmu.

Mesirow fæddist í Boston og faðir hennar er meðlimur í hljómsveitinni Blue Man Group sem er starfrækt í Berlín. Hún er mikill aðdáandi Joni Mitchell og kemur stundum fram með grímu á tónleikum. Glasser spilar rólega og draumkennda tónlist og mun hita upp fyrir Jónsa og hljómsveit hans fram til níunda júní.

Tónleikaferð Jónsa um Evrópu stendur yfir þar til í lok nóvember, með stoppi í Ástralíu og Japan í ágúst. Að loknum tónleikunum í Japan spilar hann á Norðurlöndunum, meðal annars á staðnum Vega í Kaupmannahöfn 17. ágúst. Hljómsveit Jónsa er annars skipuð Alex Somers kærasta hans, Úlfi Hanssyni, Þorvaldi Þór Þorvaldssyni og Ólafi Birni Ólafssyni.

Þeim félögum var vel tekið á nýafstaðinni tónleikaferð þeirra um Kanada og Bandaríkin. Samkvæmt heimasíðu Jónsa voru tónleikagestir sammála um að hann hefði staðið fyllilega fyrir sínu þrátt fyrir að félagar hans í Sigur Rós hafi verið fjarri góðu gamni.