Móðir Gillz: „Þetta jaðrar við að vera einelti“

„Ég er mjög óhress með þetta, þetta jaðrar við að vera einelti," sagði móðir Egils „Gillzeneggers" Einarssonar, um ásakanir og mótmæli sem beinast gegn Agli vegna meintrar kvenfyrirlitningar hans.

Mótmælin spruttu fram vegna þess að Egill verður meðhöfundur símaskráarinnar en þegar hafa um fimmhundruð manns bæði skrifað undir þar til gert mótmælaskjal á netinu og skráð sig á Facebook þar sem aðkomu hans að skránni er mótmælt.

Sjálfur hefur Egill borið af sér sakirnar en í viðtali við Vísi í gær sagðist hann elska konur og bætti við að hann ætti mömmu.

Hún heitir Ester Ásbjörnsdóttir og sagði í viðtali við útvarpsmanninn Þorkel Mána Pétursson, í Harmageddon á X-inu 977, að hún hefði ekki alið son sinn upp í kvenfyrirlitningu.

„Við sem þekkjum hann vitum að hann er góður drengur og ekkert annað en góður við konurnar í fjölskyldunni," sagði Ester í viðtali við Mána en henni fannst illa vegið að syni sínum.

„Ég skil ekkert í þessari konu, þetta er þriggja ára gömul bloggfærsla sem hann baðst afsökunar á," sagði Ester og bætti við að henni fyndist framtak konunnar, sem stofnaði Facebook-síðuna, með ólíkindum.

„Ég er mjög óhress með þetta. Þetta eru stór orð, í raun hálfgert níð," sagði Ester sem er sár fyrir hönd sonar síns.

„Að stofna þessa síðu til þess eins að rakka niður eina manneskju jaðrar við að vera einelti," sagði Ester sem þvertekur fyrir að sonur sinn sé haldinn nokkurri kvenfyrirlitningu.

„Ég ól hann ekki þannig upp," sagði Ester ákveðin.

Hægt er að hlusta á viðtalið hér. Þess má geta að þátturinn Harmageddon er í loftinu núna.