Þingfundi ítrekað frestað

Til stóð að önnur umræða um frumvarp ríkisstjórnarinnar um þjóðaratkvæðagreiðslu hæfist klukkan hálf fimm í dag en þingfundi hefur ítrekað verið frestað. Allsherjarnefnd hefur fjallað um frumvarpið frá því að fyrstu umræðu lauk á þriðja tímanum fyrr í dag. Til stendur að þingfundur hefjist klukkan sex en áætlanir ríkisstjórnarinnar ganga út á að frumvarpið verði orðið að lögum í lok dags.

Alþingi kom saman í morgun í fyrsta sinn á þessu ári og var frumvarp til laga um þjóðaratkvæðagreiðslu lagt fram við upphaf fundar. Þetta er sögulegur þingfundur því aldrei hafa verið sett lög um þjóðaratkvæðagreiðslu frá 1944 þegar samþykkt var að fara í þjóðaratkvæðagreiðslu um fyrstu stjórnarskrá lýðveldisins. Fyrsta umræða hófst svo skömmu eftir að frumvarpið var lagt fram.