Rýrir trúverðugleika íslenskra fjölmiðla

Samsetning eignarhalds á stærstu einkareknu fjölmiðlunum á Íslandi er ekki gefin upp sundurliðuð. Formaður Blaðamannafélags Íslands segir það mjög óeðlilegt og að það rýri trúverðugleika íslenskra fjölmiðla.

Engin lagaskylda hvílir einkareknum fjölmiðlum um að þeir gefi upp hverjir eigi þá. Og sundurliðun eignarhalds á stærstu einkareknu fjölmiðlunum liggur ekki fyrir

Að sögn Óskars Magnússonar eru stærstu eigendur Árvakurs, útgáfufélags Morgunblaðsins og mbl.is, auk hans sjálfs félagið Krossanes ehf. sem er í eigu Samherja og Hlynur ehf. sem er í eigu Guðbjargar Matthíasdóttur. Innbyrðis skipting þessara hluthafa fékkst ekki upp gefin.

Eigendur fjörutíu til fimmtíu prósents hlutafjár eru m.a Rammi hf. á Siglufirði og Páll H. Pálsson útgerðarmaður oft kenndur við Vísi. Þá má nefna Gunnar B. Dungal, Þorgeir Baldursson í Odda og Ásgeir Bolla Kristinsson, sem hér áður fyrr var kenndur við verslunina Sautján.

DV hefur sem kunngt er skipt um eigendur og blaðið er nú gefið út af DV ehf., er í eigu Lilju Skaftadóttur sem á 32 prósenta hlut og Reynis Traustasonar sem á 33 prósent, en þau eru stærstu hluthafarnir. Aðrir smærri hluthafar eru t.d Bogi Emilsson og Halldór Jörgensson, sem saman fara með 16 prósenta hlut, verðbréfafyrirtækið Arev ehf. og Catalina ehf. sem rekur samnefnda krá í Kópavogi.

365 miðlar, sem eiga og reka Fréttablaðið, Stöð 2, Vísi og Bylguna eru í eigu Ingibjargar Pálmadóttur, sem á rúmlega 90 prósenta hlut en Ari Edwald, forstjóri og Stefán Hilmarsson, fjármálastjóri eiga svo samtals tæplega 10 prósenta hlut. Hlutafé var aukið hinn 1. apríl og sé miðað við heildarhlutafé er hlutur Ingibjargar 72 prósent og Ara og Stefáns 8 prósent. Ekki fæst upp gefið hverjir séu eigendur 20 prósent hlutafjár í svokölluðum B-hluta, en enginn atkvæðisréttur fylgir því hlutafé.

Myllusetur ehf. er útgáfufélag Viðskiptablaðsins og að sögn Péturs Árna Jónssonar, útgefanda, eru tveir þriðju hlutar hlutafjár í hans eigu og á Sveinn Biering Jónsson einn þriðja.

Þóra Kristín Ásgeirsdóttir, formaður Blaðamannafélags Íslands, segir það óeðlilegt ekki liggi fyrir nákvæm samsetning hlutafjár hjá einkareknum fjölmiðlum. Það sama gildi um upplýsingar um eignarhaldið og styrki til stjórnmálaflokka, almenningur eigi heimtingu á að vita hverjir það séu sem standi þeim að baki.