Framleiðandi merkir tískuvörur Gyðju vitlaust

„Þetta er allt mín hönnun, en í sumum tilfellum er vitlaust nafn skráð,“ segir Sigrún Lilja Guðjónsdóttir, hönnuður og eigandi Gyðju Collection, en á síðu kínversks vöruframleiðanda má sjá myndir af hönnun Sigrúnar Lilju og eru þær sumar hverjar merktar sem hönnun óþekkts Mr. Stephano og hefur það vakið nokkra furðu.

„Framleiðandi minn er kínverskur og er umrædd vefsíða í hans umsjón og þar sýnir hann þær vörur sem hann hefur framleitt fyrir viðskiptavini sína. Mér hafði áður verið bent á að önnur nöfn stæðu undir myndum af mínum vörum, ég hafði samband við hann í kjölfarið og hann staðfesti þetta við mig. Ég bað hann þá um að leiðrétta þetta og merkja vörurnar rétt og ég vissi ekki betur en að hann hafi gert það, en svo virðist ekki vera.“ Hún segir Kínverja með annan hugsunarhátt en Íslendinga þegar komi að viðskiptum og fyrir þeim er höfundaréttur ekki eins heilagur og mörgum öðrum. „Gyðja er lítið fyrirtæki á kínverskum skala og mig grunar að þeim þyki flottara að merkja vörurnar ítölsku fyrirtæki heldur en litlu íslensku hönnunarfyrirtæki,“ segir Sigrún Lilja.

Séu myndirnar skoðaðar ítarlega má vel greina að töskurnar bera merki Gyðju Collection en ofan á það hefur merki kínverska fyrirtækisins, verið teiknað með aðstoð tölvutækninnar. „Þetta er mjög algengt vandamál í tískuheiminum, að verið er sé að stela hönnun frá öðrum. Gyðja hefur vaxið mikið á skömmum tíma og ég gerði mér bara enga grein fyrir því að þetta væri vandamál sem ég þyrfti að hafa í huga. Mér þykir þetta ákaflega leiðinlegar fréttir og ég mun að sjálfsögðu hafa aftur samband við framleiðandann tafarlaust og biðja hann um að leiðrétta þennan misskilning.

Ef þetta er ekki vel framsett hjá þeim þá getur þetta skaðað merkið mitt og mitt nafn og það er afskaplega slæmt,“ segir Sigrún Lilja að lokum.

sara@frrettabladid.is