Tekur ekki þátt í skítkasti

„Við tökum ekki þátt í svona skítkasti," segir Gunnar I. Birgisson, fyrrum bæjarstjóri Kópavogs um bréf sem var stílað á iðkendur íþróttafélagsins í HK í Kópavogi og Vísir greindi frá í gær.

Gunnar segir bréfið lítið annað en skítkast í sinn garð en sjálfur vilji hann iðka jákvæða og kosningabaráttu, eða, „með gleði í hjarta," eins og Gunnar orðar það sjálfur.

Bréfið sem um ræðir var sent á einstaklinga innan HK en það hefst á ávarpinu: „Jæja kæru HK-ingar."

Í bréfinu eru HK-ingar hvattir til þess að ganga í flokkinn, sama hvaða stjórnmálaskoðun þeir aðhyllast, og kjósa andstæðing Gunnars í fyrsta sætið, Ármann Kr. Ólafsson. Þá eru HK-ingar einnig hvattir til þess að kjósa Sigurjón Sigurðsson í þriðja sætið en hann er formaður HK.

Síðan er áréttað að fólk geti skráð sig úr flokknum eftir prófkjör, þá þyrfti eingöngu að ræða við Sigurjón eða þann sem sendi bréfið, sem heitir Óli Þór Júlíusson, en hann var starfsmaður HK fyrir um tveimur árum síðan.

Þegar haft var samband við Sigurjón í gær vegna málsins þá sagði hann bréfið ekki hafa verið sent út í nafni HK. Þá hafi póstlisti íþróttahreyfingarinnar ekki verið notaður til þess að dreifa bréfinu.

Það var svo í dag sem framkvæmdarstjóri HK sendi út yfirlýsingu á fjölmiðla til þess að árétta að félagið væri ekki notað í pólitískum tilgangi.

Gunnar tekur undir að baráttan í prófkjöri Sjálfstæðisflokksins í Kópavogi hafi verið hörð. Hann segir að menn verði að hemja folann: „Stundum hleypur mönnum kapp í kinn."