Kragh hefur óskað eftir endurupptöku sakamáls vegna orða burðardýrs

Þorsteinn Kragh, sem afplánar níu ára fangelsisdóm vegna smygls á tæplega 200 kílóum af fíkniefnum, hefur sent inn formlega beiðni til Hæstaréttar um endurupptöku á máli sínu. Enskukunnátta hollensks burðardýrs virðist lykilatriði í því hvernig beiðni Þorsteins verður tekið.

Í fréttum okkar fyrir skömmu sögðum við frá því að burðardýrið í máli Þorsteins, Hollendingurinn Jacob Van Hinte, hefði skrifað bréf úr fangelsinu á Litla-Hrauni, þar sem hann sagði Þorstein saklausan í málinu. Hann væri fórnarlamb glæpagengsi í Hollandi sem væri raunverulegur skipuleggjandi smyglsins.

Helgi Jóhannesson verjandi Þorsteins, staðfestir í samtali við fréttastofu að Þorsteinn hafi sent Hæstarétti formlega beiðni um endurupptöku málsins, en ekkert svar hafi borist þaðan. Rökin fyrir endurupptökunni, eru meðal annars þær upplýsingar sem fram koma í bréfinu umrædda.

Þar biður Jacob Þorstein meðal annars um að fyrirgefa sér að hafa bendlað hann við málið, en segir að líf sitt hefði annars verið í hættu. Hann sé nú orðinn heilsuveill, eigi skammt eftir ólifað, og vilji skilja við guð og menn með hreina samvisku.

Lögregla telur bréfið afar ótrúverðugt og efast í raun um að Jacob sjálfur hafi ritað það. Meðal annars vegna þess að það sé skrifað á ensku sem sé ekki hans sterkasta hlið.

Athygli vekur hinsvegar að enskukunnátta Jacobs var ekki dregin í efa þegar málið var flutt fyrir dómi. Þá bað Jacob sjálfur um að túlkað yrði fyrir sig á ensku, frekar en hollensku, og var Ellen Ingvadóttir löggiltur dómtúlkur fengin til þess.

Samkvæmt heimildum fréttastofu mun Jacob nær eingöngu hafa leigt sér enskar bækur á bókasafninu á Litla-Hrauni, auk þess sem hann var áskrifandi af New York Times.

Jacob afplánar nú sjö og hálfs árs fangelsisdóm í Hollandi, en hann mun sjálfur hafa farið þess á leit við fangelsismálayfirvöld að fá að ljúka afplánun í heimalandinu.