Áhættusækni tengist mögulega erfðum

Svæðið í heilanum sem stjórnar ótta fólks virkjast við þá tilhugsun eina að tapa peningum. Þetta leiddi rannsókn á tveimur konum með skemmdir í svæðinu í ljós en báðar voru hvergi bangnar við að leggja fé að veði.

Vísindamenn við Tækniháskólann í Pasadena í Kaliforníu og Háskólann í London skoðuðu af hverju fólk er tregt til að taka þátt í fjárhættuspili þó vinningslíkur séu góðar. Þeir rannsökuðu fyrrnefndar konur, sem báðar þjást af sjaldgæfum erfðasjúkdómi sem eyðileggur svokallaða möndlu (e. amygdala), sem er stöð í heilanum sem stjórnar ótta ásamt öðrum tilfinningum. 12 aðrir, með óskemmda heila, voru einnig skoðaðir.

Rannsóknin fól í sér að þátttakendur voru beðnir um að taka þátt í veðmálum. Hún sýndi að konurnar tvær voru mun reiðubúnari en hinir til að taka áhættu.

Niðurstöður rannsóknarinnar sýna að umrætt svæði í heilanum, mandlan, vekur varkárni hjá fólki við að leggja verðmæti undir. Að mati vísindamannanna má nýta niðurstöðurnar til að skilja af hverju sumir eru áhættusæknari en aðrir. Að þeirra sögn hefur það mögulega með erfðir að gera.