Beyoncé ræður Victoriu Beckham í vinnu

Söngkonan Beyoncé Knowles er þessa dagana að taka upp fjórðu plötu sína sem hún ætlar að gefa út seinna á árinu. Í kjölfarið fer hún síðan í heljarinnar tónleikaferð um heiminn. Hún hafði samband við Victoriu Beckham og bað hana um að teikna föt og búninga fyrir tónleikana. Victoria samþykkti þetta og ætlar að senda henni hugmyndir sínar.

Victoria Beckham sendi frá sér fatalínu fyrr í vetur sem hefur gengið mjög vel. Beyoncé er ein af mörgum stjörnum sem hefur tekið línunni opnum örmum. Hún á nokkra kjóla úr línunni og sólgleraugu, sem hún notar mikið.

Þetta var fjórða lína Victoriu sem virðist vera búin að koma sér nokkuð vel fyrir í tískuheiminum. Þegar hún kom fyrst fram á sjónarsviðið sem hönnuður voru viðbrögðin misjöfn. Eftir tískuvikuna í New York nú í vetur var ánægjan aftur á móti almenn og salan tók kipp.