Steven Taylor sagður á leið til Liverpool

Roy Hodgson, nýráðinn knattspyrnustjóri Liverpool, er sagður áhugasamur um að fá Steven Taylor, varnarmann Newcastle, til liðs við félagið.

Það er Sunday Mirror sem greinir frá þessu í dag en Liverpool er sagt reiðubúið að leggja fram tilboð upp á fimm milljónir punda í kappann.

Newcastle vann sér sæti í ensku úrvalsdeildinni á ný í vor en forráðamenn félagsins hafa sagt að þeir ætli sér ekki að eyða miklu í leikmannakaup í sumar.

Taylor á eitt ár eftir af núverandi samningi sínum við Newcastle og mun vera áhugasamur um að fara til Liverpool en hann hefur einnig verið orðaður við Arsenal og Aston Villa.