Bönd munu berjast

Undankeppni alþjóðlegu hljómsveitakeppninnar Global Battle Of The Bands hófst á Sódómu Reykjavík í gærkvöldi. Keppinn stendur yfir til laugardags og á meðal hljómsveita sem stíga á svið er Bróðir Svartúlfs, sigursveit Músíktilrauna, Nögl og We Made God.

„Við búumst fastlega við því að það verði hart barist enda er þátttökumiðinn erlendis ekkert slor,“ segir skipuleggjandinn Franz Gunnarsson. Sigursveitin tryggir sér þátttökurétt í úrslitakeppninni sem verður haldin í London í lok apríl. Verðlaunin eru tíu þúsund dollarar, vikudvöl í hljóðveri með upptökumanni í London og tíu daga tónleikaferð um England. Í fyrra sigraði hljómsveitin Agent Fresco í íslensku undankeppninni en hún var einnig valin bjartasta vonin á Íslensku tónlistarverðlaununum.

Öll tónleikakvöldin hefjast klukkan 21. Aðgangseyrir er 500 krónur og aldurstakmark er átján ár. - fb