Fálki gerði sér dagamun í Sólheimum

„Ég þurfti að fara upp á þrettándu hæð til þess að taka mynd af honum," segir húsvörðurinn Hörður Ástþórsson, en fálki gerði sér dagamun og sveif á milli blokkanna í Sólheimum í Reykjavík.

Hörður náði myndinni en úr mikilli fjarlægð. Hann var hinsvegar með sjónauka til þess að skoða fálkann betur.

„Fálkinn var augljóslega karlkyns," segir Hörður sem fylgdist með fálkanum svífa á milli húsa þar til hann tyllti sér ofan á lyftuhús á Sólheimum 23.

Hann segist ekki hafa séð fálka í borginni áður. Fálkar halda sig helst nærri freðmýrum og fjallendi sem og við strendur. Aðalfæða fálka er rjúpur en hann veiðir einnig endur, svartfugla og vaðfugla.