Ómar og Guðjón Árni áfram hjá Keflavík

Markvörðurinn Ómar Jóhannsson og bakvörðurinn Guðjón Árni Antoníusson hafa báðir skrifað undir nýjan samning við Keflavík.

Þeir voru báðir með lausan samning og segir á heimasíðu Keflavíkurliðsins að unnið sé að því að ganga frá samningum annarra leikmanna sem eru í sömu stöðu.

Báðir hafa leikið með Keflavík í langan tíma. Ómar á að baki 140 leiki í deild og bikar og Guðjón Árni hefur skorað fjórtán mörk í 179 leikjum.

Meðal annarra leikmanna sem eru samningslausir í Keflavík má nefna Alen Sutej, Bjarna Hólm Aðalsteinsson, Brynjar Örn Guðmundsson, Einar Orra Einarsson, Hauk Inga Guðnason, Hólmar Örn Rúnarsson og Paul McShane.