Röggi segir fréttir að norðan

Akureyringar á höfuðborgarsvæðinu ætla að hittast og gera sér glaðan dag saman á skemmtistaðnum Spot í Kópavogi á laugardagskvöldið. Skriðjöklar, Bravó-bítlarnir, Hunang og Dægurlagapönkhljómsveitin Húfa troða upp auk þess sem Rögnvaldur gáfaði og Kalli Örvars ætla að fara með gamanmál.

Rögnvaldur gáfaði, sem er jú í Dægurlagapönkhljómsveitinni Húfu man ekki hvenær hljómsveitin spilaði saman síðast.

„Það er orðið mjög langt síðan. Sex eða sjö ár örugglega. Nei, ég lýg því. Við tókum eina tónleika á Græna hattinum svona sirka 2006. Það ætlaði allt vitlaust að verða."

Kunnið þið þetta enn þá?

„Það kemur í ljós. Við ætlum að hittast á föstudagskvöldið og rifja þetta upp og sjá hvort við getum spilað þetta. Þetta var svo ískyggilega hratt allt að ég held að við verðum að hægja eitthvað á þessu."

Þið Karl Örvarsson ætlið að grínast, gerið þið það saman eða hvor í sínu lagi?

„Ég veit það ekki, það fer eftir stemningunni. Annars byrjuðum við Kalli saman í hljómsveitarbransanum á sínum tíma. Þá bjuggum við báðir í Grænumýrinni og stofnuðum Sýklana. Við vorum geðveikt frægir í Mýrunum."

Hafa Sýklarnir aldrei komið saman aftur síðan þá?

„Nei, en það stóð til í fyrra en datt uppfyrir. Það átti að hóa saman nokkrum gömlum Akureyrarböndum hér fyrir norðan. En svo vildu menn fá borgað flug og hótel og það komast ekki nema 200 manns á Græna hattinn þannig að þetta var orðið of dýrt áður en það var komið af stað."

En hvurslags grín ætlarðu að bjóða upp á á Spot?

„Þar sem gestirnir verða líklega aðallega brottfluttir Akureyringar ætla ég að flytja þeim fréttir að norðan. Til dæmis ætla ég að segja frá því að Ella og Salomon eru að fara að opna sushi-stað. Þetta verður ekki dæmigerður sushi-staður heldur sushi-kjúklingastaður. Ég ætla að segja þessa frétt og fleiri. Það er alltaf eitthvað að gerast hérna." - bþs