Rannsakaðir af Alþingi og saksóknara

Hvað líður rannsóknum á þætti endurskoðenda í bankahruninu? Tvö stærstu endurskoðunarfyrirtæki landsins sæta nú sakamálarannsókn vegna vinnu sinnar fyrir bankana í aðdraganda hrunsins.

Í tveimur skýrslum sem unnar voru fyrir embætti sérstaks saksóknara og fjallað hefur verið um í fjölmiðlum komast erlendir rannsakendur að þeirri niðurstöðu að annað þeirra, Price­water­houseCoopers, hafi sitthvað óhreint í pokahorninu. Það hafi lokað augunum fyrir því að Glitnir og Landsbankinn hafi í raun verið komnir að fótum fram árið 2007 og gleypt allt hrátt sem frá bönkunum kom án þess að spyrja nokkurra spurninga.

Lítið fæst gefið upp um sambærilega athugun á starfi KPMG fyrir Kaupþing, sem vitað er að hefur farið fram. Ekkert þriðja teymi erlendra sérfræðinga hefur hins vegar liðsinnt sérstökum saksóknara þá athugun.

Ólafur Þór Hauksson, sérstakur saksóknari, er fámáll um rannsókn embættisins á endurskoðendum. „Við hófum þetta formlega með húsleitum í október 2009. Síðan hafa verið fengin þessi tvö teymi sem frægt er orðið til að leggjast yfir gögn og greina fyrir okkur. Þau hafa fengið töluverða kynningu í fjölmiðlum en að öðru leyti er málið bara í ferli og við getum lítið sagt annað en það,“ segir hann.

Útgangspunkturinn þegar ráðist var í húsleitirnar hafi verið að komast að því hvort upplýsingar um fjárhagslega stöðu bankanna hefðu verið rangar. „Næsta skref var að fara í gegnum ábyrgð hvers og eins í því.“

Ábyrgð endurskoðenda verður tekin til athugunar til víðar en hjá saksóknara. Í þingsályktunar­tillögu þingmannanefndar Atla Gíslasonar, sem fjallaði um rannsóknarskýrslu Alþingis og lagði til viðbrögð þingsins við henni, segir að í ljósi atburða skuli viðskiptanefnd hafa forgöngu um endurskoðun á lögum um endurskoðendur. Til grundvallar þeirri vinnu á að fara fram á vegum þingsins ítarleg úttekt á störfum ytri endurskoðenda fram að hruninu.

Magnús Orri Schram, vara­formaður viðskiptanefndar, segir að úttektin sé ekki hafin. „Það var ákveðið að setja þetta mál í farveg í janúarbyrjun þegar álagið verður orðið minna,“ segir Magnús.

Á þessi stigi sé ekki hægt að segja til um í hvaða formi úttektin verði.

Endurskoðendur sjálfir hafa vísað því á bug að þeir hafi látið gagnrýni á störf sín í aðdraganda hrunsins sem vind um eyru þjóta og ekki brugðist við. Ný lög um endurskoðendur hafi þegar tekið gildi á grundvelli tilskipunar Evrópu­sambandsins, sem hafi gjörbylt starfsumhverfi þeirra, og staða þeirra hafi verið rætt á fjölda málþinga. stigur@frettabladid.is