Frumvarp að þriggja ára áætlun um rekstur, framkvæmdir og fjármál Reykjavíkurborgar á árunum 2011-2013 er afskaplega rýr og endurspeglar hvorki forgangsröðun né pólítíska sýn meirihluta borgarstjórnar að mati Sóleyjar Tómasdóttur.
Hanna Birna Kristjánsdóttir, borgarstjóri, mælti í dag fyrir frumvarpi að þriggja ára áætlun um rekstur, framkvæmdir og fjármál Reykjavíkurborgar fyrir árin 2011-2013.
Sóley segir að þar gefi að líta fjölfaldaða fjárhagsáætlun borgarinnar fyrir árið 2010 án sundurliðunar eftir sviðum, stofnunum og fyrirtækjum borgarinnar og án nokkurra upplýsinga um viðbrögð borgaryfirvalda við þeirri efnahagslægð sem hér kemur til með að ríkja á næstu árum.
„Frumvarpið er í fullu samræmi við vinnubrögðin við gerð fjárhagsáætlun meirihlutans, þar sem óskilgreind hagræðingarkrafa var sett út á sviðin, án þess að meirihutinn axlaði pólítíska ábyrgð á útfærslu hennar eða forgangsröðuninni almennt," segir Sóley um áætlunina.
Hún segir að það sé ljóst að á komandi árum munu útgjöld aukast vegna velferðarmála og jafnljóst að lítið sem ekkert svigrúm sé eftir til niðurskurðar á öðrum sviðum.
„Áform meirihlutans um hallalausan rekstur án skattahækkana eru því með öllu óraunhæf eins og áætlunin í heild sinni," segir hún að lokum.
