Stefán Þór gerir tveggja mánaða samning við IFK Norrköping

Skagamaðurinn Stefán Þór Þórðarsson hefur ákveðið að snúa aftur í sænska fótboltann og spila með IFK Norrköping í b-deildinni í júlí og ágúst.

Stefán Þór lék við góðan orðstír hjá félaginu árin 2005-2007 þegar félagið komst meðal annars upp í efstu deild en á síðasta ári féll liðið hins vegar og hefur farið illa af stað á yfirstandandi keppnistímabili.

Stefán Þór sammældist um að hlaupa undir bagga með félaginu í tvo mánuði en mikið er um meiðsli í framherjasveit félagsins um þessar mundir.

„Ég væri ekki að þessu nema að ég væri mjög sáttur við þessa ákvörðun. Félagið á bara í miklum vandræðum og ég ætla að gera mitt besta til þess að hjálpa til. Þetta eru allt saman strákar í liðinu sem ég þekki og hef spilað með og sama gildir um fólkið í kringum félagið. Það hefur gengið illa hjá félaginu eftir fallið á síðasta tímabili og núna eru vandræði með meiðsli á framherjum og því leituðu þeir til mín. Ég mun vera þarna úti í júlí og ágúst og reyna að hjálpa til og vera þarna til taks," segir Stefán Þór.

Það kemur ekki á óvart að IFK Norrköping hafi leitað til Stefáns Þórs en hann er sannkölluð goðsögn hjá félaginu og þegar hann hætti að spila í Svíþjóð var treyjan hans númer 18 til að mynda hengd upp í virðingarskyni við kappann. Stefán Þór segist vissulega finna fyrir smá pressu að koma aftur inn í þetta en það sé bara góður hlutur.

„Það er alltaf pressa og það er það sem maður getur ekki slitið sig frá. Spennufíknin við að vera með fólkið á bakinu og að það ætlast til þess að maður geri eitthvað," segir Stefán að lokum.