Íslenski riðillinn sá versti í undankeppni HM?

Talsverðar líkur eru á því að liðið sem lendir í öðru sæti í íslenska riðlinum í undankeppni HM 2010 í knattsprynu komist ekki í umspil um sæti á mótinu.

Sigurvegarar riðlanna níu komast beint áfram á HM. Þau átta lið sem ná bestum árangri í öðru sæti riðlanna mætast í umspili um fjögur laus sæti.

Það þýðir að að eitt þeirra liða sem nær öðru sæti síns riðils mun sitja eftir. Allar líkur eru á því að það verði í 9. riðli - íslenska riðlinum.

Skotland og Makedónía eru nú jöfn í öðru sæti riðilsins með sjö stig. Ísland er í fjórða sæti með fjögur stig og Noregur á botninum með þrjú. Norðmenn og Skotar eiga þó leik til góða.

Skotar eru með nú með næstversta árangur þeirra liða sem sitja í öðru sæti sinna riðla - sjö stig eftir fimm leiki. Króatía er með verstan árangur, fimm stig eftir fjóra leiki. Króatar eiga hins vegar eftir mun auðveldari andstæðinga en Skotar.

Blaðamaður enska dagblaðsins The Times fullyrðir í dag að Skotar verði að vinna minnst tvo leiki og ná einu jafntefli í síðustu þremur leikjum sínum í riðlinum til að koma sér í umspilið.

Skotar eiga eftir að mæta Norðmönnum ytra og svo Makedóníu og Hollandi á heimavelli.

Hollendingar eru með fullt hús stiga í riðlinum og hafa þegar tryggt sér efsta sætið.