Capello: Við spilum til að vinna

Ítalinn Fabio Capello, landsliðsþjálfari Englands, er eðlilega afar ánægður með þær framfarir sem enska landsliðið hefur tekið undir hans stjórn. Liðið hefur unnið alla sjö leiki sína í undankeppni HM og er með annan fótinn á HM og rúmlega það.

„Við höfum búið til liðsheild og nýjan stíl á vellinum. Það er afar mikilvægt að andinn í hópnum sé réttur. Við spilum ávallt til þess að vinna," sagði Ítalinn en England fór illa með Andorra í gær.

„Síðast byrjuðum við ekki svo vel gegn Andorra. Við skoruðum seint í leknum en skref fyrir skref höfum við verið að bæta okkar leik. Það sést."

England spilar næst æfingaleik gegn Hollandi þann 12. ágúst.