Megson vill breyta leikstíl Bolton

Knattspyrnustjórinn Gary Megson hjá Bolton vonast til þess að geta styrkt leikmannahóp sinn í sumar með nokkrum gæðaleikmönnum sem gætu hjálpað félaginu að taka næsta skrefið eins og hann orðar það.

Megson er fyrstur til þess að viðurkenna að Bolton hafi á tíðum ekki verið að spila skemmtilegasta fótboltann í úrvalsdeildinni á síðustu leiktíð til þess eins að kría út mikilvæg stig í baráttunni um að halda sér frá falli.

„Ég myndi gjarnan vilja breyta leikstíl Bolton þar sem ég tel að sú leikaðferð sem við beittum á síðustu leiktíð hafi átt stóran þátt í því að við náðum aldrei almennilega að komast á skrið. Við áttum vissulega mjög góða leiki en við áttum líka nokkra alveg skelfilega. Vonandi náum við að fá inn nýja leikmenn í sumar sem er vanir því að spila öðruvísi fótbolta til þess að fá meiri vídd í okkar leik," segir Megson í samtali við opinbera heimasíðu félagsins.

Landsliðsmaðurinn Grétar Rafn Steinsson leikur sem kunnugt er með Bolton og var með bestu leikmönnum félagsins á síðasta keppnistímabili.