Landsliðsþjálfari Suður-Afríku rekinn eftir afleitt gengi

Landsliðsþjálfarinn Joel Santana hjá Suður-Afríku var rekinn í dag úr starfi sínu eftir afleitt gengi undanfarið.

Brasilíumaðurinn Santana hafði stýrt liðinu í um eitt og hálft ár en eftir átta töp í síðustu níu leikjum sagði knattspyrnusamband Suður-Afríku stopp og rak hann úr starfi.

Síðasti leikur Santana við stjórnvölin var 1-0 tap gegn Íslendingum í vináttulandsleik á Laugardalsvelli á dögunum. Suður-Afríka heldur sem kunnugt er HM 2010 og er þar af leiðandi með þátttökurétt í mótinu sem gestgjafar.

Það verða því eflaust margir þjálfarar um hituna þegar nýr landsliðsþjálfari verður ráðinn á næstu dögum.

Jafnvel er búist við því að Brasilíumaðurinn Carlos Alberto Parreira muni snúa aftur í landsliðsþjálfarastarfið en hann sagði starfi sínu lausu árið 2008 áður en Santana tók við.